Zainudin Nafarin, Urang Banjar Pencipta Anti Virus SMADAV

Zainuddin Nafarin atau biasa dikiyau Zai ngini urang Banjar matan Amuntai nang maulah antivirus lokal Smadav. Zai maulah Smadav tahun 2006 wayah inya masih kelas XI IPA 1 di SMAN 2 Palangka Raya, Kalimantan Tengah.

Zai mulai balajar Pemrograman Visual Basic di laboratorium komputer SMAN 2 Palangkaraya sekitar pertengahan tahun 2006. Zai mancari materi tutorial balajar VB banyak lewat internet gasan dipraktikakan sorang. Wayahitu inya ke warnet dua atau tiga hari sekali, marga warnet nang taparak bajarak sekitar 5 kilometer matan rumahnya. Wayahitu di Palangka Raya warnet masih jarang.

Pamulaan Anti Virus SMADAV tacipta sabujurnya marga kada baistilah. Wayahitu ada beberapa kawanannya nang minta wan Zai supaya mambarasihi komputernya nang kena virus-virus lokal, padahal Zai wayahitu masih cukup awam tentang virus lokal. Zai jua banyak mandatangi rumah kawanannya gasan mambantui mambarasihi virus lokal di komputer kawanannya secara manual. Marga ngini, supaya kada tapi repot mandatangi wayahitu Zainuddin mulai maulah aplikasi SmadAV.

Imbah Berapa Bulan Lahirlah SMADAV v1.0

Zainuddin Nafarin mangarani Anti Virus SMADAV marga Zai sekolah di SMAN 2 Palangka Raya nang biasa disambat Smada. AV nya baarti Anti Virus. Kenapa jadi pakai ngaran nang diambil matan SMA nya ? Marga Zai mulai mempelajari programming wayah sekolah kelas XI di Smada wayahitu bahkan Zai hanyar bisi komputer mulai kelas X.

Pamulaan Zai mengembangakan SmadAV mulai Oktober 2006 sampai Mei 2007 imbah ngitu ditunda marga Zai umpat Olimpiade Matematika tingkat Provinsi bulan Mei 2007. Zai handak sementara fokus ke Olimpiade. Imbah ngitu marga lolos lagi sampai tingkat Nasional, jadinya Zai tetap konsentrasi di Olimpiade sampai akhir Oktober 2007. Imbah Olimpiade tuntung, lagi-lagi Zai masih belum kawa mengembangakan SmadAV, marga wayahitu Zai nang sudah kelas XII harus siap-siap gasan mahadapi Ujian Nasional. Zai bapikir inya harus belajar habis-habisan, kada gasan mahadapi UN haja tapi jua gasan tes masuk Universitas. Imbah Zai masuk UGM disitu inya manyambung lagi mengembangakan SmadAV.

Wayah kuliah di UGM masuk jurusan Matematika tahun 2008, Zai nang lahir di Amuntai September 1990 ngini jua sampat bagawi jadi Programmer Freelance. Marga kuliah perlu biaya wan kiriman pas-pasan kuitannya nang pegawai Departemen Agama dan guru TK haja, maulah Zai bapikir kuliah sambil bagawi. Zai nang anak pamulaan matan ampat badangsanak matan pasangan Rojiannoor dan Marhamah ngini sampat bagawi jadi Programmer Freelance di beberapa perusahaan asing nang gajinya Rp 5 juta per bulan. Tapi marga bagawi malam wan menyita waktu banar kuliah Zai keteteran marga wayah dapat proyek, inya kada kawa guring malam. Apalagi, rata-rata nang mamasan program matan Amerika Serikat nang beda waktunya wan Indonesia sekitar 12 jam. Wayahitu nilai kuliah Zai hancur jadinya inya bapikir pindah jurusan ke Ilmu Komputer.

Diam-diam, kada bapadah wan kuitannya, Zai umpat pulang ujian masuk perguruan tinggi wayah tahun kedua inya di Jogja. Inya diterima di Jurusan Ilmu Komputer di UGM jua. Jadinya ilmu kuliah wan gawian programmer freelancenya kawa sama-sama jalan.

Zai hanyar bapadah wan abahnya wayah abahnya datang ke Jogja. Biar abahnya takajut, tapi Zai kawa mayakinakan, amun ini nang tabaik gasan inya.

Lagi-lagi, duit kiriman kuitannya nang tabatas maulah Zai maudak Smadav lagi. Ada kawan SMA nya nang wayahitu maingatakan amun Smadav harus tetap eksis. Sekitar akhir 2008, Zai mulai mangambangakan upgrade Smadav pulang maupgrade. Hasilnya bagus. Wayah sekitar Juli 2009, Anti Virus SMADAV rami lagi. Fitur-fiturnya gin ditambahi tarus. Wayahitu, donasi nang masuk per bulan bisa mencapai Rp 10 juta.

Wayahini Smadav paling hanyar Smadav 2016 Rev. 11.0.4. Pengguna Antivirus Smadav wayahini sampai puluhan juta, kada matan Indonesia haja tapi banyak jua pengguna luar Indonesia. Kauntungannya nang didapatakan matan Smadav wayahini mulai Rp.30 juta sampai Rp.80 juta sabulan. Smadav ada nang gratis ada jua versi babayarnya nang disambat Smadav Pro. Smadav Pro bisi fitur tabanyak wan kada harus diupdate tiap bulannya. Biaya gasan mamakai antivirus Smadav Pro ngini Rp.30 ribu haja salawasan.

Imbah lulus matan UGM, Zai nang jadi CEO Smadav merekrut dua kawannya matan Palangka Raya jua gasan mangawani mengembangkan Smadav. Zai wan kawanannya bakantor manyewa ruko di Palangkaraya di Jalan Raden Saleh Induk 1. Zai manargetakan kawa melebarakan sayap dengan merekrut banyak karyawan di seluruh Indonesia

Anti Virus SMADAVulahan Zai ngini bisi kemampuan mendeteksi virus yang kuat biar antivirus lokal haja. Zai bisi rasa kepuasan sorang kawa maulah aplikasi nang kawa membantu pengguna komputer atau laptop nang taganggu marga virus matan perangkat luar nangkaya flashdisk.

Sumber Tulisan: Pulau Banua Banjar